တစ်ရှူးသစ်တည်ဆောက်ကုသခြင်းဆေးပညာ/သွား-ဆေးပညာ-Regenerative Medicine/Dentistry

ဆေးပညာအပါအ၀င်သိပ္ပံပညာရပ်တွေဟာ၊ သုတေသနသစ်တွေ ရှာဖွေတွေ့ရှိချက်သစ်တွေနဲ့အမြဲပြောင်းလဲတိုးတက်နေပါတယ်။ ကိုယ်ခန္ဓာအစိတ်အပိုင်းတစ်ခုခုရောဂါဖြစ်ရင်၊ ဆေးပေးပြီးကုသတယ်။ လိုအပ်ရင်ခွဲစိတ်ကုသတယ်။ သိပ်ဆိုးနေရင်ခွဲထုတ်ဖြတ်ထုတ်ပစ်ရပြီး အတုတွေနဲ့အစားထိုးကြရပါတယ်။ အတုတွေက သဘာဝကိုယ်ခန္ဓာအစိတ်အပိုင်းတွေလို လုပ်ငန်းဆောင်တာမလုပ်နိုင်ပါဘူး။ ဒါက ၁၉၉၀မတိုင်ခင်အထိပါ။ ၁၉၉၀နောက်ပိုင်းကစပြီး တစ်ရှူးတည်ဆောက်ခြင်းဆိုတဲ့ Tissue Engineering ပညာရပ်ပေါ်ပေါက်လာခဲ့ပြီး Regenerative Medicine လို့ခေါ်တဲ့ ကိုယ်ခန္ဓာအစိတ်အပိုင်းအသစ်ပြန်လည်ဖွဲ့စည်းစေခြင်းအားဖြင့် ပျက်စီး၊ဖြတ်တောက်လိုက်ရတဲ့ကိုယ်ခန္ဓာအစိတ်အပိုင်းတွေကို အတုတပ်တာမဟုတ်ဘဲ တကယ့်သဘာဝအစိတ်အပိုင်းတွေလို လုပ်ငန်းဆောင်တာလုပ်ဆောင်နိုင်အောင်ကုသပေးတဲ့ပညာရပ်ခေတ်စားလာခဲ့ပါတယ်။ သုတေသနတွေမျိုးစုံလုပ်ပြီးကိုယ်အဂါင်္အစိတ်အပိုင်းတွေအသစ်ဖွဲ့စည်းနိုင်မယ့်နည်းလမ်းသစ်တွေကြံဆရှာဖွေလာခဲ့ကြပါတယ်။ အရိုး၊ အရိုးနု၊ အသား၊ ရိုးတွင်းခြင်ဆီ၊ ဆီးအိမ်စတဲ့အစိတ်အပိုင်းတွေအသစ်တည်ဆောက်တဲ့နည်းလမ်းတွေအောင်မြင်စွာတွေ့ရှိခဲ့ကြပြီး လူသားတွေမှာကုသမှုတွေပေးနေပါပြီ။ နှလုံး၊ သွေးကြော၊ ပန်ကရိယ၊ အသည်းစတဲ့အရေးကြီးတဲ့ကိုယ်တွင်းကလီစာတွေအသစ်ဖွဲ့စည်းနိုင်အောင်သုတေသနတွေလုပ်နေကြဆဲဖြစ်ပါတယ်။ ကိုယ်ခန္ဓာအစိတ်အပိုင်းတွေထဲမှာအပါအ၀င်ဖြစ်တဲ့ သွားကိုလည်းအသစ်ဖွဲ့စည်းနိုင်အောင်၊ သုတေသနပြုနေကြဆဲဖြစ်ပါတယ်။

ဒီလိုမျက်မှောက်ခေတ်ဆေးပညာမှာအရေးပါလာတဲ့ Tissue Engineering ပညာရပ်အကြောင်းနည်းနည်းဗဟုသုတအဖြစ်ရေးပြချင်ပါတယ်။ Tissue Engineering မှာမရှိမဖြစ်လိုအပ်တဲ့အရာ ၃ခုရှိပါတယ်။ Cells-ဆဲလ်တွေ၊ Signal လို့ခေါ်တဲ့ ဒီဆဲလ်တွေကိုအသစ်ဖွဲ့စည်းစေချင်တဲ့တစ်ရှူးအဖြစ်ဖွဲ့စည်းစေအောင်လှုံ့ဆော်ပေးတဲ့ ဓာတ်တွေနဲ့ ဆဲလ်တွေတွယ်ကပ်ပွားများပြီးတစ်ရှူးဖွဲ့စည်းနိုင်အောင်ထောက်ကူပေးတဲ့ scaffold ခေါ်တဲ့ပစ္စည်းတွေဖြစ်ပါတယ်။

ဒါကြောင့်ဒီလိုTissue Engineering သုတေသနတွေလုပ်မယ့် သူတွေဟာ၊ ကိုယ်တည်ဆောက်မယ့်ကိုယ်အဂါင်္အစိတ်အပိုင်းနဲ့ဆိုင်တဲ့ ဆဲလ်တွေအကြောင်း၊ ကိုယ်ခန္ဓာအစိတ်အပိုင်းအမျိုးမျိုးအတွက်ဆိုင်ရာဆဲလ်အသီးသီးအဖြစ်အသွင်ပြောင်းနိုင်တဲ့ ပင်မဆဲလ်လို့ခေါ်တဲ့ stem cells အကြောင်းတွေ၊ ဒီလိုအသွင်ပြောင်းပြီးတစ်ရှူးတွေဖြစ်တည်စေနိုင်ဖို့လိုအပ်တဲ့signal ဓာတ်တွေအကြောင်းလေ့လာသဘောပေါက်ရတဲ့အပြင်၊ Biomaterials လို့ခေါ်တဲ့ သက်ရှိကိုယ်ခန္ဓာထဲမှာထည့်သွင်းအသုံးပြုနိုင်တဲ့ပစ္စည်းတွေအကြောင်းကိုလည်းသိရပါတယ်။ ဒါတွေကိုပေါင်းစပ်ပြီး၊ ကိုယ်အဂါင်္အစိတ်အပိုင်းတွေကိုဖြစ်ပေါ်ဖွဲ့စည်းလာနိုင်အောင် Tissue Engineering အတတ်ပညာနဲ့လုပ်ဆောင်ရပါတယ်။

ကျွန်တော်လုပ်ဆောင်နေတဲ့သုတေသနကတော့၊ သွားနဲ့ခံတွင်းမှာသာမက၊ အထွေထွေဆေးပညာအတွက်ပါအသုံးတဲ့မယ့်၊ အရိုးသားတည်ဆောက်ခြင်း Bone Tissue Engineering ဖြစ်ပါတယ်။ အရိုးဟာကိုယ်ခန္ဓာအဂါင်္အစိတ်အပိုင်းတွေကိုထောက်ပံ့ကာကွယ်ပေးထားတဲ့အရေးကြီးတဲ့တစ်ရှူးတစ်ခုဖြစ်ပါတယ်။ သွားတွေဟာလည်းအရိုးသားထဲမှာတည်မြဲနေကြရတယ်။ သွားနှုတ်လိုက်ရရင် ဒီအရိုးသားက တဖြည်းဖြည်းနိမ့်ဆင်းပါးလျားသွားပါတယ်။ အရိုးသားမရှိတော့ရင် သိပ်နိမ့်သွားရင် သွားတုတွေပြန်စိုက်လို့မရတော့ပါဘူး။ ဒါ့အပြင်ကင်ဆာကြောင့် အရိုးသားကိုလှီးထုတ်လိုက်ရသူတွေ မွေးရာပါနှုတ်ခမ်းကွဲအာခေါင်ကွဲရောဂါရှင်တွေအတွက် အရိုးသားသစ်ပြန်တည်ဆောက်ပေးဖို့ လိုအပ်ပါတယ်။
သဘာဝကိုယ်ခန္ဓာထဲမှာ၊ အရိုးဆဲလ်တွေကို အရိုးသားသစ်တည်ဆောက်လာစေအောင်လှုံ့ဆော်ပေးတဲ့ BMP လို့အတိုကောက်ခေါ်တဲ့ပရိုတိန်းတမျိုးရှိပါတယ်။ ဒီပရိုတိန်းကို Biotechnology လို့ခေါ်တဲ့ပညာရပ်ကိုသုံးပြီး Recombinant လို့ခေါ်တဲ့ လူရဲ့ပရိုတိန်းဓာတ်ကို တခြားသက်ရှိဆဲလ်တွေမှာဖွဲ့စည်းတည်ဆောက်စေတဲ့မျိုးဗီဇပေါင်းစပ်ပြုပြင်တဲ့နည်းနဲ့ဓာတ်ခွဲခန်းထဲမှာ ထုတ်လုပ်ကြပါတယ်။ အရိုးသားလိုအပ်နေတဲ့လူနာတွေမှာသုံးစွဲပြီး၊ အလွန်ထိရောက်ပါတယ်။ ဒါပေမယ့်ပြဿနာက၊ နောက်ဆုံးပေါ်နည်းလမ်းတွေ ပစ္စည်းကိရိယာတွေသုံးပြီးထုတ်လုပ်ရတဲ့အတွက် ဈေးအရမ်းကြီးပါတယ်။ အရိုးကျီးပေါင်းရောဂါကုဖို့ဒီပရိုတိန်းကိုသုံးရင် ဒေါ်လာ၃၀၀၀ကနေ ၅၀၀၀အတွင်းကျပါတယ်။ ငွေတတ်နိုင်တဲ့လူနာတွေအတွက်ဘဲသုံးနိုင်ပါတယ်။ ဒါကြောင့်လူနာအများတတ်နိုင်တဲ့ဈေးမကြီးတဲ့ကုသနည်းကိုရှာဖွေနေကြပါတယ်။ ဒီထဲမှာ ကျွန်တော်လုပ်တဲ့သုတေသနက simvastatin လို့ခေါ်တဲ့ သွေးတွင်းကိုလက်စထရောအဆီကျစေတဲ့ဆေးကိုသုံးပြီး Tissue Engineering နည်းပညာနဲ့အရိုးသားသစ်တည်ဆောက်တဲ့သုတေသနဖြစ်ပါတယ်။ ဒီဆေးရဲ့အာနိသင်က သွေးအတွင်းကိုလက်စထရောအဆီဓာတ်ကျစတာအပြင်၊ အရိုးဆဲလ်တွေကို BMP ပရိုတိန်းထုတ်နိုင်အောင်လှုံ့ဆော်ပေးပါတယ်။ ဒါကိုသုံးပြီး၊ Biomaterials တွေအမျိုးမျိုးနဲ့စမ်းသပ်ပေါင်းစပ်ကြည့်နေခဲ့ပါတယ်။ ကျွန်တော့်သုတေသနတွေကတွေ့ရှိချက်တွေကို NewsRx-2007Oct နဲ့ NewsRx-2009Marchဆေးပညာစာစောင်တွေ က ဖော်ပြထားတာတွေ့ရပါတယ်။ အကောင်လေးတွေမှာသုတေသနအောင်မြင်ပြီးတဲ့နောက် လူနာတွေမှာသုံးစွဲကုသနိုင်ဖို့ စပြီး clinical study လုပ်နေပါပြီ။ မဝေးတော့တဲ့အနာဂတ်မှာအရိုးပြဿနာတွေအတွက်၊ လူနာအများစုသုံးနိုင်ပြီး၊ ထိရောက်တဲ့ဆေးပစ္စည်းအဖြစ်အသုံးဝင်လာမယ်လို့မျှော်လင့်ရပါတယ်။
အရိုးအပြင်တခြားကိုယ်အင်္ဂါအစိတ်အပိုင်းတွေကိုအသစ်တည်ဆောက်နိုင်မယ့်နည်းပညာတွေတိုးတက်တွေ့ရှိခြင်းအားဖြင့် လူသားတွေကို Regenerative Medicine/Regenerative Dentistry ပညာရပ်တွေနဲ့ထိထိရောက်ရောက်ကုသပေးနိုင်ပါစေလို့ဆန္ဒပြုလိုက်ရပါတယ်။