Saturday, October 18, 2008

သွားတိုက်ဖို့ပြင်ကြစို့


သွားနဲ့ခံတွင်းရောဂါတွေဖြစ်လာရင် ခံစားရတယ်၊ အလုပ်အကိုင်ပျက်တယ်၊ ကုသစရိတ်ကြီးတယ်။ ကုသပြီးရင်လည်းအမေမွေးပေးလိုက်တဲ့အတိုင်းသဘာဝအကောင်းအတိုင်းပြန်မဖြစ်နိုင်တော့တာတွေများတယ်။ ဒါကြောင့် မဖြစ်ခင်ကကြိုတင်ကာကွယ်တာအကောင်းဆုံးဖြစ်ပါတယ်။ စနစ်ကျမှန်ကန်စွာသွားမှန်မှန်တိုက်မယ်ဆိုရင်၊ သွားနဲ့ခံတွင်းဆိုင်ရာရောဂါတွေကို ကာကွယ်နိုင်ပါတယ်။ စနစ်ကျမှန်ကန်တဲ့သွားတိုက်နည်းစနစ်တွေ၊ ဘလော့ဂါအသိုင်းအ၀ိုင်းမှတဆင့်၊ ကိုယ့်မိသားစု၊ ကိုယ့်ဆွေမျိုး၊ ကိုယ့်ပတ်ဝန်းကျင်မှာရှိတဲ့သူတွေ..စသည်ဖြင့်အဆင့်ဆင့်ဗဟုသုတပြန့်ပွားသွားစေဖို့ရည်ရွယ်ပြီးဒီပို့စ်ကိုဆက်ရေးလိုက်ပါတယ်ခင်ဗျား။ သိပြီးသားပုဂ္ဂိုလ်များလည်း အလားတူအသိဖြန့်ဝေပေးကြမယ်ဆိုရင်၊ ကျန်းမာရေးဗဟုသုတကြွယ်ဝတဲ့လူ့အဖွဲ့အစည်းဖြစ်လာမယ်လို့ယုံကြည်ပါတယ်။

သွားတိုက်တော့မယ်ဆိုရင် ပထမဆုံးလိုတာက သွားတိုက်တံပါ။
ကဲ..ဘယ်လိုသွားတိုက်တံကိုရွေးဝယ်ကြမလဲ။
(၁) သွားပွတ်တံအမျှင်လေး(bristles)တွေပျော့ပျောင်းတဲ့အမျိုးအစားရွေးသင့်ပါတယ်။ Soft, Medium, Hard ဆိုပြီးတော့ ပျော့၊ အလယ်အလတ်၊အမာစားဆိုပြီးသုံးမျိုးရှိပါတယ်။ အမျှင်တွေမာရင် သွားဖုံးမှာအနာတရဖြစ်စေပြီး၊ သွားကြားတွေကို သွားတိုက်တံအမျှင်တွေမ၀င်နိုင်ပါဘူး။ အစာတွေကသွားနှစ်ချောင်းကြားတွေမှာပိုပြီးကပ်ကျန်တတ်ပါတယ်။ ဒါကြောင့်သွားဖုံးကိုလည်းအနာတရမဖြစ်အောင်၊ သွားကြားတွေပါအမျှင်တွေရောက်အောင်တိုက်နိုင်တဲ့
နူးညံ့တဲ့အမျှင်ပါတဲ့သွားတိုက်တံကိုသာရွေးသုံးသင့်ပါတယ်။
(၂) သွားတိုက်တံခေါင်းဟာ ကြီးလွန်းရင်၊ ရှည်လွန်းရင်၊ အံဆုံးတွေရဲ့အပြင်မျက်နှာပြင်နဲ့ဝါးတဲ့မျက်နှာပြင်တွေတိုက်ရာမှာ အခက်အခဲရှိလို့၊ ခေါင်းအလတ်ဒါမှမဟုတ်ခေါင်းသေးတဲ့သွားတိုက်တံကိုဘဲသုံးသင့်ပါတယ်။ ကလေးဆိုလည်းကလေး အသက်အရွယ်အလိုက် သင့်တော်တဲ့အရွယ်အစားမျိုးဝယ်ပေးရပါတယ်။
(၃) သွားတိုက်တံလက်ကိုင်ပိုင်းဟာ မချော်ဘဲမြဲမြဲမြံမြံကိုင်နိုင်တဲ့၊ လက်ကိုင်မျိုးဖြစ်သင့်ပါတယ်။
(၄) ပုံမှန်လူတွေအတွက် မော်တာတပ်ထားတဲ့စက်သွားတိုက်တံဟာ၊ ရိုးရိုးသွားတိုက်တံထက်ပိုအကျိုးမရှိပါဘူး။

သွားတိုက်တံဟာ ကိုယ့်ရဲ့တသက်တာဘ၀ကြင်ဖော်မဟုတ်ပါဘူး။
မကြာခဏအသစ်လဲပေးရပါမယ်။ ဘာလို့လဲဆိုတော့၊ နေ့စဉ်နဲ့အမျှသွားတိုက်လာတာ၊ အချိန်တန်ရင် အမျှင်လေးတွေဖွာလာပါတယ်။ အမျှင်ဖွာကော့ပျံနေတဲ့တံမြက်စည်းနဲ့လှည်းရင် အမှိုက်မပြောင်သလိုဘဲ၊ အမျှင်ဖွာသွားတိုက်တံဟာ အစာကြွင်းအစာကျန်တွေ၊ ပိုးမွှားလွှာတွေကို မရှင်းလင်းနိုင်ရုံသာမက၊ သွားဖုံးကို အနာတရဖြစ်စေနိုင်ပါတယ်။

တချို့သွားတိုက်တံတွေကတော့၊ အမျှင်တွေမှာ အရောင်တွေနဲ့ indicator ပါပြီး၊ အရောင်ဖျော့သွား၊ပျောက်သွားရင်သွားတိုက်တံအသစ်လဲဖို့သတိပေးတဲ့အနေနဲ့ထည့်ထားတတ်ပါတယ်။ ဒါပေမယ့်လည်းပုံမှာပြထားတဲ့သွားတိုက်တံလို colour code အရောင်မလွင့်ခင်အမျှင်တွေဖွာသွားတာမျိုးလည်းရှိတတ်ပါတယ်။

အလွယ်ဆုံးကတော့၊ (၃)လတစ်ခါ သွားတိုက်တံအသစ်လဲပါ။ (၃-လမတိုင်ခင်အမျှင်တွေဖွာသွားရင်လည်းအသစ်လဲပါ)
ဒီနေရာမှာ၊ ကိုယ်သွားတိုက်တာမှန်လားမှားလားသိချင်ရင်အလွယ်လေးပါဘဲ။
(၁)လလောက်အတွင်း သွားတိုက်တံအမျှင်တွေဖွာသွားတယ်ဆိုရင်တော့၊သွားတိုက်တဲ့နည်းစနစ်မှားနေတာလား၊ မလိုအပ်ဘဲအားနဲ့ဖိတိုက်မိနေတာလား တစ်ခုခုဖြစ်နိုင်ပါတယ်။ ဒီလိုဆိုရင်တော့၊ သွားဖုံးတွေအနာတရဖြစ်နိုင်တယ်၊ သွားဖုံးတွေနိမ့်ကျလာစေနိုင်တယ်၊ သွားအခြေတွေမှာ Abrasion လို့ခေါ်တဲ့ ပွတ်ဆွဲဒဏ်ကြောင့်သွားပါးပွန်းသွားတာတွေ ရေရှည်မှာဖြစ်လာနိုင်ပါတယ်။
သွားခြေတွေပွန်းနေတာ(abrasion)

(၃-၄) လကြာလို့မှ သွားတိုက်တံအမျှင်တွေ ဖွာမလာဘူးဆိုရင်တော့၊ သွားကိုမထိတထိတိုက်မိနေတာလား၊ ညဆိုအိပ်ချင်တာနဲ့..ကဲ.တော်ပါပြီ.မနက်မှပေါင်းတိုက်လိုက်တော့မယ်..ဆိုပြီးအချိန်မှန်မတိုက်ဖြစ်တာလား၊ တစ်ခုခုပါဘဲ။
ကဲ..ဒီနေ့ကစပြီးသွားတိုက်တံအသစ်ဝယ်ပြီိး နေ့စွဲမှတ်ပြီးစမ်းကြည့်ကြရအောင်လား။

သွားတိုက်ပြီးတိုင်းသွားတိုက်တံကို သေသေချာချာပွတ်ပြီး ရေများများနဲ့ဆေးချ၊ ရေကိုစင်အောင်စစ်ခါပြီးမှ၊ သိမ်းသင့်ပါတယ်။ ပိုးမွှားတွေအများကြီး အမျှင်တွေမှာပါလာလို့ပါ။ မိသားစုဝင်အချင်းချင်းဖြစ်ပါစေ သွားတိုက်တံကို ရှယ်ယာလုပ်ပြီးမသုံးသင့်ပါဘူး။
ရောဂါကူးစက်စေပါတယ်။ ရွာတွေကို ဇီဝိတဒါနကုသမှု၊စစ်တမ်းကောက်ယူမှုတို့နဲ့သွားခဲ့တဲ့အချိန်တွေတုံးက တချို့အိမ်တွေမှာတွေ့ခဲ့ဖူးလို့ပါ။

လူကြီးတွေအတွက်ပြီးရင်၊ ကလေးလေးတွေအတွက်လည်းစဉ်းစားရမှာပါ။ ဘယ်အသက်အရွယ်ကစပြီးကလေးသွားတွေကိုတိုက်ပေးသင့်ပါသလဲ။
ကလေးသွားတွေဟာ အသက်(၆)လကစပြီးပေါက်လေ့ရှိပြီး ၂နှစ်ခွဲလောက်မှာ ငယ်သွားအချောင်း (၂၀) စလုံးစုံပါပြီ။ ခံတွင်းသန့်ရှင်းရေးကိုတော့ သွားပေါက်တဲ့အထိစောင့်စရာမလိုပါဘူး။ သွားမပေါက်ခင်ကတည်းက ချိုချိုစို့ပြီးတိုင်း သွားဖုံးလေးတွေပေါ်ကို၊ နူးညံ့တဲ့အ၀တ်စလေးလက်မှာပတ်၊ရေသန့်သန့်လေးဆွတ်ပြီး ပွတ်ပေးသန့်ရှင်းပေးသင့်ပါတယ်။ သွားစပေါက်ချိန်မှာလည်း ဆက်ပြီးသွားလေးတွေကို ဒီနည်းနဲ့ပွတ်တိုက်သန့်စင်ပေးရမှာဖြစ်ပြီး၊ သွား (၅-၆)ချောင်းလောက် ပေါက်ပြီးချိန်အသက်(၁)နှစ်လောက်ကနေ စပြီး၊ မိဘက ကလေးသွားတိုက်တံနုနုလေးတွေသုံးပြီး ကလေးကိုသွားတိုက်ပေးရပါမယ်။
စတိုက်ချိန်မှာ မထွေးတတ်သေးလို့ သွားတိုက်ဆေးမထည့်ပေးသင့်ပါဘူး။ ထွေးတတ်ပြီဆိုရင်တောင်၊ ဖလိုရိုက်မပါတဲ့သွားတိုက်ဆေးကို နည်းနည်းလေးဘဲထည့်ပေးသင့်ပါတယ်။ ကလေးအသက် (၂)နှစ်ကျော်ပြီး၊ သေချာထွေးတတ်၊ ပလုတ်ကျင်းတတ်ပြီဆိုရင်တော့၊ Fluoride-ဖလိုရိုက်ဓာတ်ပါတဲ့သွားတိုက်ဆေးကို၊ ပဲလုံးသေးသေးပမာဏလောက်ဘဲထည့်ပေးပြီးတိုက်ခိုင်းသင့်ပါတယ်။ (ဖလိုရိုက်ဓာတ်က သွားပိုးစားတာကာကွယ်နိုင်ပေမယ့်၊ ကလေးငယ်လေးတွေမျိုချမိရင်..များများမျိုမိရင်အသက်အန္တရာယ်ရှိပြီး၊ နည်းနည်းမျိုမိရင် နောက်ပေါက်မယ့်ကြီးသွားတွေမှာ fluorosis လို့ခေါ်တဲ့ သွားတွေပုံစံနဲ့အရည်အသွေးပျက်တာ၊ အရောင်ညိုပြီးမမာတာ၊ စတာတွေဖြစ်နိုင်ပါတယ်။ သွားတိုက်ဆေးပို့စ်မှာဖလိုရိုက်အကြောင်းထပ်ရေးပါဦးမယ်)

ကဲ..သွားတိုက်ဖို့ပြင်ဆင်တဲ့အပိုင်းလေးကိုဒီလောက်နဲ့ဘဲ ရပ်နားပါရစေ။ အားလုံးကျန်းမာပျော်ရွှင်ရောဂါစင်ကြပါစေ။

7 comments:

Meengelay said...

သွားတိုက်တံ နေ့စွဲမှတ်ပြီး သုံးကြည့်ဖို့ မစဉ်းစားခဲ့မိဘူး။
ဂရုတစိုက်လာဖတ်တဲ့ အတွက်လဲ ကျေးဇူးတင်ပါတယ်ရှင့်။

ဖီးနစ် said...

မသိတာလေးတွေပြောပြပေးတဲ့အတွက်ကျေးဇူးတင်ပါတယ်
နောက်လဲများများမျှဝေနိုင်ပါစေ

Andy said...

အပြန်ကျရင် သွားတိုက်တံဝယ်ရဦးမှာပါလား

သတိပေးလို့ကျေးဇူးပဲ ဆရာရေ့...

Taungoo said...

ဆရာရေ
အင်မတန်သိသင့်တဲ့ အကြောင်းအရာအတွက် ကျေးဇူးပါ။ သွားပွတ်တံနဲ့ ဘယ်လိုတိုက်တာက ပိုမိုသင့်လျော်တဲ့အကြောင်းလေးပါ ထပ်ရေးပေးပါလားဆရာ။ အထက်အောက်နဲ့ ဘေးတိုက်က အမြဲ ပြဿနာတက်လွန်းလို့ပါ။

Dr. Nyan said...

ဟုတ်ကဲ့..နောက်ပို့စ်တွေမှာဆက်ရေးပါ့မယ်ခင်ဗျား။

khemar said...

ဒေါက်တာရေ၊ အံဆုံးအကြောင်း ဆောင်းပါး ဖတ်ပြီး ပုံပျက်နေတဲ့ ကျွန်မ အောက်အံဆုံးကို သေချာပြန်စစ်ကြည့်တော့ အပေါ်ကို မထောင်ဘဲ ဘေးကို ၉၀ ဒီဂရီ လှဲရက်သား ပေါက်နေတယ်။ သွားဘေးသားက အပေါ်ကို ရောက်ပြီး သွားရဲ့ အစာတွေကို ဖိချေရမယ့် အပေါ်မျက်နှာပြင်က ဒုတိယအံသွားရဲ့ နောက်ဘက်ကို မျက်နှာချင်းဆိုင် လှည့်ပြီး လှဲနေတယ်။ အစာတွေကတော့ စားပြီးတိုင်း အဲဒီကြားထဲ ပုံမှန် ဝင်နေကျ ဂိုဒေါင်ကြီးပဲ။ ပြင်လို့ ရနိုင်သေးလား အပြီး နှုတ်ရမှာလား သိရပါစေ။ ဘယ်လို လုပ်သင့်ပါသလဲရှင့်

Dr. Nyan said...

မKhemarခင်ဗျား
နှုတ်ရုံကလွဲလို့အကောင်းဆုံးနည်းလမ်းမမြင်ပါဘူး။
ဒုတိယအံသွားကိုဒုက္ခမပေးခင်နှုတ်သင့်ပါတယ်။