ကလေးသွားကျန်းမာရေးအပိုင်း (၃)

လက်မ၊ လက်ချောင်း၊ ချိုလိမ်စုိ့ခြင်းနဲ့ ကလေးသွားကျန်းမာရေးအကြောင်း

ကလေးများဘာကြောင့်...
နို့ချိုစို့တာအပါအ၀င်၊ စို့ခြင်း-စုပ်ခြင်း (sucking) ဟာ၊ ကလေးတွေအားလုံးမှာရှိတဲ့သဘာဝလုပ်ငန်းဆောင်တာတခုဖြစ်ပါတယ်။ အာရုံကြောနဲ့ကြွက်သားဆက်စပ်လှုံ့ဆော်တုန့်ပြန်မှု (neuromuscular reflex) တွေထဲကတစ်ခုအပါအ၀င်ဖြစ်ပါတယ်။ မမွေးခင် အမိဝမ်းထဲမှာကတည်းကသန္ဓေသားလေးတွေဟာစုပ်တာ၊ စို့တာလုပ်တတ်နေပါပြီ။

မွေးလာပြီးချိန်မှာတော့ နို့ချိုစို့တာအပြင်၊ လက်မ-ချိုလိမ်-ဒါမှမဟုတ် တခြားပစ္စည်းတခုခုကိုစုပ်တာဟာ ကလေးရဲ့စိတ်ပိုင်းဆိုင်ရာခံစားမှုကိုပြတဲ့အရာတခုဖြစ်လာပါတယ်။ လက်မစုပ်နေရရင် ကလေးငယ်ဟာ ကိုယ့်ဘာသာလုံခြုံသွားသလိုခံစားရတယ်၊ ကျေနပ်မှုကိုခံစားရတယ်၊ စိတ်ဖြေလျော့စေတယ်လို့ဆိုပါတယ်။ ဒါကြောင့်ကလေးငယ်တွေ အဆူခံရလို့ဖြစ်ဖြစ် စိတ်အလိုမကျတဲ့အခါဖြစ်ဖြစ်လက်မစုပ်တတ်ပါတယ်။ စိတ်ကိုဖြေလျော့စေတဲ့အတွက်၊ ချိုလိမ်ခေါင်း (pacifier) ပေးစုပ်ထားရင် ကလေးငယ်ဟာ အလွယ်တကူအိပ်ပျော်တာတွေ့ရပါလိမ့်မယ်။

ကလေးအတွက်ဘယ်လိုပြဿနာတွေ...
လက်မ-ချိုလိမ်စုပ်တဲ့အကျင့်ဟာ စွဲသွားတတ်ပါတယ်။ ငယ်စဉ်မှာလက်မ-ချိုလိမ်စုပ်တာဟာ ကလေးသွားတွေအပေါ်အကျိုးသက်ရောက်မှုမရှိပေမယ့်၊ ကြီးသွားတွေစထွက်တဲ့အရွယ်ထိ ဒီအကျင့်ကမပျောက်သေးရင်၊ ကြီးသွားတွေနဲ့ သွားဖုံးရိုး၊ အာခေါင်မိုးကြီးထွားမှုမှာ ဆိုးကျိုးဖြစ်နိုင်ပါတယ်။

ပုံမှာတွေ့ရတဲ့အတိုင်း ကလေးရဲ့လက်မက အပေါ်ရှေ့သွားတွေကိုဆွဲလှန်သလိုဖြစ်စေတဲ့အတွက် ရှေ့သွားတွေနဲ့သွားဖုံးရိုးကိုခေါစေပါတယ်။
လက်မက အပေါ်နဲ့အောက်သွားတွေကြားမှာခံထားတဲ့အတွက်၊ အပေါ်ရှေ့သွားတွေနဲ့အောက်ရှေ့သွားတွေမထိတော့ဘဲ ကွက်လပ်ဖြစ်လာစေနိုင်ပါတယ်။ လျှာကလက်မခံနေတဲ့အတွက် နောက်ကိုရောက်သွားပြီး လျှာအနေအထားနဲ့အထိန်းအသိမ်းမှာထိခိုက်နိုင်ပါတယ်။ စုပ်အားကြောင့် ခံတွင်းထဲမှာဖိအားနည်းပြီး၊ ပါးအပြင်ကဖိအားကပိုများနေတဲ့အတွက် မေးရိုး-သွားဖုံးရိုးကြီးထွားမှုကိုတားဆီးသလိုဖြစ်ပါတယ်။


ဒီအကျိုးဆက်တွေက တနေ့မှာဘယ်လောက်ကြာကြာလက်မစုပ်တယ်၊ ဘယ်အရွယ်ထိလက်မစုပ်တယ်ဆိုတာပေါ်မူတည်ပြီး၊ အနည်းအများကွာခြားနိုင်ပါတယ်။ လက်ထည့်ရုံထည့်ထားတတ်တဲ့ကလေးနဲ့ သိသိသာသာလက်ကိုစုပ်တဲ့ကလေးယှဉ်ကြည့်ရင် စုပ်တဲ့ကလေးကပိုပြီးဆိုးကျိုးခံစားရပါမယ်။ လက်မစုပ်တာနဲ့ ချိုလိမ်အကြာကြီးစို့တာ ဆိုးကျိုးဖြစ်ပုံခြင်းအတူတူဖြစ်ပါတယ်။ ချိုလိမ်ကိုဖြတ်ရတာလွယ်ပေမယ့် ကလေးကလက်စုပ်တဲ့အကျင့်ပါသွားရင် ဖြတ်ဖို့ခက်တတ်ပါတယ်။

ဘယ်အရွယ်မှာလက်မ-ချိုလိမ်စုပ်တာပြတ်နေရမလဲ...
ကလေးအများစုဟာအသက်၂နှစ်ကနေ၄နှစ်အတွင်းဒီအကျင့်ပျောက်သွားပါတယ်။ ပိုစောတဲ့ကလေးတွေလည်းရှိပါတယ်။ Peer pressure လို့ခေါ်တဲ့ အရွယ်တူအုပ်စုတွေနဲ့ထိတွေ့မှုစောစောရတဲ့ကလေးတွေမှာလည်း၊ ဒီအကျင့်စေစောပျောက်တတ်ပါတယ်။ ကလေးငယ်ရဲ့ရှေ့သွားတွေက အသက်၆နှစ်မှာ ကြီးသွားစပေါက်တာမို့ ဒီအသက်မတိုင်မီမှာ အကျင့်လုံးဝပျောက်နေဖို့အရေးကြီးပါတယ်။
အသက်ငယ်တုန်းမှာလည်းဒီချိုလိမ်အကျင့်ကြောင့်သွားဖုံးရိုးနဲ့သွားအနေအထားတွေထိခိုက်စေတာ အောက်မှာပြထားတဲ့သုတေသနတွေ့ရှိချက်အရတွေ့နိုင်ပါတယ်။



ဘယ်လိုကုသမလဲ...
လက်မစုပ်တဲ့အကျင့်စွဲသွားလို့ဖြစ်ရတဲ့ခံတွင်းမေးရိုးနဲ့သွားအနေအထားပြောင်းလဲမှုတွေကို သွားညှိကုအထူးကုဆရာဝန်နဲ့တိုင်ပင်ပြသပြီး သွားညှိကိရိယာ (orthodontic appliance)၊ မေးရိုးကြီးထွားမှုထိန်းကျောင်းကိရိယာ (functional appliance)တွေတပ်ဆင်ကုသစေရပါတယ်။
လက်မစုပ်တဲ့အကျင့်ပျောက်စေဖို့...
- ကလေးကနားလည်တတ်တဲ့အရွယ်ဆိုရင် လက်မစုပ်လို့ဖြစ်နိုင်တဲ့အကျိုးဆက်တွေကိုစိတ်ရှည်လက်ရှည်ရှင်းပြပေးပါ။ကလေးကိုမဆူရပါဘူး၊ လက်မစုပ်တဲ့အကြိမ်နည်းသွားအောင် အားပေးတာကနေစရပါမယ်။ လက်မမစုပ်ဘဲကြာကြာနေနိုင်တဲ့အခါချီးကျူးပေးပါ။ ဆုချပေးပါ။ ဒါဟာကလေးကအမူအကျင့်ပြောင်းလာအောင်တွန်းအားဖြစ်စေပါတယ်။ ဆူပူလိုက်ရင်ကလေးရဲ့စိတ်မလုံခြုံမှုပိုဆိုးသွားပြီး၊ အကျင့်ပျောက်ဖို့ခဲယဉ်းစေပါတယ်။
- စိတ်ပိုင်းဆိုင်ရာကကြည့်ရင်၊ ကလေးမှာ စိတ်မလုံခြုံမှုတခုခုခံစားရနေတာ၊ နွေးထွေးချော့မြူမှုလိုအပ်နေတာ၊ ပျင်းနေတာ၊ စိတ်ပူနေတာ၊ စိတ်ဖိစီးမှုတခုခုရှိနေတာမျိုးရှိနေတဲ့အခါ ဒီလိုဖြစ်တတ်တာမို့ မိဘက အကြောင်းရင်းကိုရှာဖွေဖော်ထုတ်ပေးရပါတယ်။ ကိုယ့်ရဲ့ဂရုစိုက်မှုနည်းတာလား၊ ကျောင်းပတ်ဝန်းကျင်မှာအဖော်မဲ့တာလား၊ အနိုင်ကျင့်ခံရတာလားစသည်ဖြင့် ဖြစ်နိုင်တဲ့အကြောင်းရင်းတွေလေ့လာပေးပါ။
- ကလေးဟာ၊ သိစိတ်ကအကျင့်ကိုဖျောက်ချင်နေပေမယ့်၊ မသိစိတ်ကစွဲနေလို့ဖျောက်မရဘဲ အလိုလိုလက်ကပါးစပ်ထဲရောက်သွားတာမျိုးဖြစ်တတ်ပါတယ်။ ဒီအခါမျိုးမှာတော့ လက်မမှာ၊ တခုခုစွပ်ထားပေးတာ၊ ပတ်ထားပေးတာမျိုး၊ ခါးတဲ့အရသာတမျိုးမျိုးသုတ်လိမ်းထားမျိုးနဲ့ ကလေးသူ့ဘာသာသတိထားမိအောင်လုပ်ပေးရပါတယ်။

ကလေးများအလေးထားပေးကြပါ။