Recurrent aphthous ulcers သို့မဟုတ် ဒုက္ခပေးတဲ့အနာလေးတွေ

Recurrent aphthous ulcers လို့ခေါ်တဲ့ ခံတွင်းထဲမှာ တခါတလေပေါက်တတ်ပြီး၊ ဆိုးဆိုးရွားရွားအနာလေးတွေ၊ ဖြစ်ဖူးသူတွေခံစားဖူးကြမယ်လို့ထင်ပါတယ်။ အရပ်အခေါ် canker sore လို့ခေါ်ပါတယ်။ လူတိုင်းမဖြစ်တတ်ပါဘူး။ ဒီအနာလေးတွေက၊ မျိုးရိုးလိုက်ပြီးဖြစ်စေ၊ ကိုယ်စိတ်ပင်ပန်းမှု stress များတဲ့အခါဖြစ်စေ၊ အိပ်ရေးခဏခဏပျက်တဲ့အခါဖြစ်စေ၊ ခံတွင်းထဲက ပိုးမွှားတွေကြောင့်ဖြစ်စေ၊ ကိုယ်ခန္ဓာရဲ့တခြားနေရာမှာ ရောဂါတစ်ခုခုရှိတဲ့အခါဖြစ်စေ ပေါက်လေ့ရှိပါတယ်။ ဖြစ်စေတဲ့အကြောင်းရင်းအခြေခံကို သေချာမသိကြသေးပေမယ့်၊ autoimmune လို့ခေါ်တဲ့ကိုယ့်ခန္ဓာကိုယ်ရဲ့ရောဂါခုခံအားစနစ်က ခန္ဓာကိုယ်ကိုမှားပြီးပြန်တိုက်ခိုက်မိတာ၊ ပိုးမွှားစတာကိုတန်ပြန်ရင်းထွက်လာတဲ့ဓာတ်တွေက၊ ခန္ဓာကိုယ်ကိုထိခိုက်စေတာ တစ်ခုခုကြောင့်လို့ပြောနိုင်ပါတယ်။ ကျွန်တော်တို့မိသားစုထဲမှာ၊ ဖေဖေရယ်၊ အမအကြီးဆုံးရယ်၊ ကျွန်တော်ရယ်၊ ညီလေးရယ် ဒီအနာလေးတွေခကြာခဏပေါက်ပါတယ်။ တခြားမောင်နှမနှစ်ယောက်က လုံးဝမဖြစ်ပါဘူး။ ကျောင်းသားဘ၀ကဆို စာမေးပွဲချိန်ဆို ညလုံးပေါက်စာကျက်တာရယ်၊ စိတ်လှုပ်ရှားတာရယ်၊ ပေါင်းလိုက်တော့ အမြဲ အနာတွေထွက်ပါတယ်။

ဒီအနာလေးတွေက အလိုလိုနေရင်းလည်းပေါက်လာတတ်တယ်။ အဖြစ်အများဆုံးက အောက်နှုတ်ခမ်းအတွင်းကအသားနေရာ၊ ပါးစောင်သား၊ လျှာအရင်းတို့ဖြစ်ပါတယ်။ တခါတလေ ဟိုးအာခေါင်နောက်၊ လျှာနောက်ဖက်ကအသားပျော့နေရာမှာ ပေါက်တတ်ပြီး၊ အစာစားရေသောက်တိုင်းနာလို့၊ sore throat လို့ခေါ်တဲ့ လည်ချောင်းနာ၊ tonsilitis လို့ခေါ်တဲ့ အာသီးရောင်တာတွေနဲ့မှားတတ်ပါတယ်။ ပါးစောင်သားတို့၊ နှုတ်ခမ်းအတွင်းသားတို့၊ လျှာတို့ကို မတော်တဆကိုက်မိလိုက်ရာကလည်း နောက်တစ်ရက်နှစ်ရက်အကြာမှာထွက်လာတတ်ပါတယ်။
အနာလေးတွေက ၃-၄ မီလီလောက်ဘဲရှိပေမယ့်၊ အရမ်းနာပါတယ်။ ရေထိတောင်နာ၊ တံတွေးနဲ့ထိမိလည်းနာ၊ စကားပြောချိန်သွားနဲ့ထိမိတောင် အသဲခိုက်အောင်နာလို့၊ အစားအသောက်စားဖို့တောင်ကြောက်မိအောင်ပါဘဲ။ ဖြစ်ခါစမှာ သေးသေးလေးနဲ့ တနေ့တခြားကြီးလာပြီး၊ အနည်းဆုံး တပတ်လောက်ခံရပါတယ်။ တပတ်ကျော်ရင် အလိုလိုပျောက်သွားပါတယ်။

ဖြစ်ဖြစ်ချင်းမှာ သွားဆေးခန်းသွားပြပြီး၊ သင့်တော်တဲ့ဆေးလိမ်းကုသမှုခံရင်၊ တစ်ပတ်ထက်စောပြီးပျောက်ပါတယ်။ ဒီအနာလေးတွေရဲ့အဓိကပြဿနာက ခံတွင်းထဲမှာနာကျင်နေလို့ စားတာသောက်တာနဲ့ တခြားနေ့စဉ်ဘ၀လုပ်ငန်းဆောင်တာတွေကို ထိခိုက်တာဖြစ်ပါတယ်။ ဒါကြောင့် ကုသမှုပေးရာမှာ၊ နာတဲ့ခံစားမှုသက်သာအောင်၊ အနာမြန်မြန်ပျောက်အောင်၊ ခံတွင်းသားကို ကာကွယ်ပေးပြီး အနာကျက်စေတဲ့ စတီးရွက်ပါတဲ့လိမ်းဆေးတွေပေးရပါတယ်။ တက်ထရာဆိုင်ကလင်းငုံဆေးကို တနေ့သုံးခါငုံထွေးပေးရင်လည်း အနာသက်သာပြီး မြန်မြန်ပျောက်တာတွေ့ရပါတယ်။ ဒီအနာဖြစ်နေတဲ့အချိန်အပူအစပ်စာကို ရှောင်သင့်ပါတယ်။ စားလည်းမစားနိုင်ပါဘူး။ အိပ်ရေးပျက်တာများနေတဲ့သူဆိုရင်တော့၊ ဆရာဝန်ကိုပြောပြရင်၊ အိပ်ဆေးရယူနိုင်ပါတယ်။ tranquilizers လို့ခေါ်တဲ့ အိပ်ဆေးတွေမှာ စိတ်လက်ပြေပျောက်စေတဲ့ အာနိသင်ပါရှိလို့ stress ကိုပါလျော့ကျစေပါတယ်။ ကျွန်တော်ကိုယ်တိုင်ခံစားဖူးပြီး၊ ချက်ချင်းနာနေတာကိုသက်သာစေတာကတော့၊ ရေခဲမုန့်ဖြစ်ပါတယ်။ ရေခဲမုန့်ကအအေးဓာတ်ကြောင့် အနာက ထုံသလိုဖြစ်ပြီး ချက်ချင်းနာနေတာကို သက်သာစေတာဖြစ်ပါတယ်။ ဆရာဝန်နဲ့ဝေးတဲ့သူတွေစမ်းကြည့်စေချင်ပါတယ်။

ခံတွင်းအတွင်း နာကျင်မှုဝေဒနာကင်းဝေးကြပါစေ။