ဂျပန်လာပြီးကျောင်းတက်ကြမယ်ဆိုရင်...

အရင်တပတ်စနေနေ့က နေတဲ့မြို့က ၄၅ထပ်အဆောက်အဦးကနေအမှတ်တရရိုက်ထားတာပါ။ တိုးတက်တဲ့တိုကျိုမြို့ပြမြင်ကွင်းနဲ့ဖူဂျီတောင်သဘာဝအလှက ဆန့်ကျင်ဖက်နှစ်ခုပေါင်းစပ်ပြီးလွမ်းမောစရာမြင်နေရပါတယ်။ ဂျပန်လာပြီးပျော်နေခဲ့တဲ့၊ မကြာခင်ပြန်ရတော့မယ့် ကျွန်တော့်အတွက်တော့ ဒီမြင်ကွင်းလေးကတကယ်လွမ်းစရာပါ။ ဂျပန်လာပြီးအကြောင်းအမျိုးမျိုးကြောင့် စိတ်ကျရောဂါရကြတဲ့သူတွေအဖို့တော့ အမြင်တမျိုးဖြစ်နိုင်ပါတယ်။ စီနီယာထဲက မိသားစုကိုလွမ်းပြီးစိတ်ကျရောဂါတနှစ်လောက်ရဖူးတဲ့အကိုတယောက်ကတော့၊ ဒီလိုမြင်ကွင်းထဲက တိုက်မြင့်မြင့်တွေကိုဆွဲနှုတ်ပြီး ပစ်လိုက်ချင်တယ်လို့မျက်ရည်တွေကျပြီးပြောကြောင်းတဆင့်စကားကြားဖူးပါတယ်။ ဟုတ်ပါတယ်။ ဂျပန်လာတဲ့သူတိုင်းမပျော်ကြပါဘူး။ မြန်မာပြည်ပြန်တဲ့အထိ စိတ်ကျရောဂါပါသွားလို့ နှစ်နဲ့ချီဆေးကုနေရတဲ့သူလည်း ကိုယ့်အလုပ်ဝန်းကျင်မှာအနီးကပ်ရှိနေခဲ့လို့ စိတ်မကောင်းစရာမြင်နေခဲ့ရဖူးပါတယ်။

ကံကောင်းစွာနဲ့ ကျွန်တော်ကတော့ မိသားစုနဲ့အတူနေရတဲ့အတွက်လွမ်းစရာမလိုသလို၊ ဆရာကောင်းပတ်ဝန်းကျင်ကောင်းနဲ့ကြုံရတော့၊ စိတ်ဓာတ်ကျစရာလည်းမရှိခဲ့ပါဘူး။ သုတေသနအလုပ်ဆိုလည်း မလုပ်ချင်တာခိုင်းခံရတာမျိုးမရှိဘဲ၊ ကိုယ်လုပ်ချင်တဲ့သုတေသနကို အချိန်မရွေးဆရာ့ကိုတိုင်ပင်ရင်၊ ယုံယုံကြည်ကြည်နဲ့ ငွေဘယ်လောက်ကုန်ကုန်ပေးလုပ်တဲ့အပြင်၊ စာတမ်းရေးရာမှာလည်း ကိုယ့်ဆုံးဖြတ်ချက်နဲ့ စိတ်ကြိုက်ရေးစေပြီး၊ အနည်းအကျဉ်းလောက်ဘဲလိုမယ်ထင်တာပြုပြင်ဖြည့်စွက်ပေးတာမျိုးမျက်နှာလွှဲပေးတဲ့အတွက်၊ စာတမ်းအားလုံးအောင်အောင်မြင်မြင်ထုတ်ဝေခွင့်ရပြီး၊ ကိုယ်ပိုင်စဉ်းစားရေးသားနိုင်တဲ့အလေ့ကောင်းရလာစေပါတယ်။ ဒါကလည်း မြန်မာပြည်မှာမာစတာဘွဲ့လွန်တက်ခဲ့စဉ်က လေ့လာခဲ့တဲ့အကျိုးနဲ့ ဂျပန်ရောက်ရောက်ချင်း ၆လလောက် နေ့တိုင်းအချိန်ရတိုင်းစာဖတ်ခဲ့တာတွေကြောင့် ကိုယ်လုပ်တာကိုင်တာ၊ စဉ်းစားတွေကိုအကဲဖြတ်ပြီး ပါမောက္ခက စိတ်ချယုံကြည်တာလည်းတစ်ကြောင်းပါပါတယ်။ တခြားကျောင်းသားတွေကိုပါ သုတေသနနဲ့ပတ်သက်ရင် ကူညီလုပ်ကိုင်ပြသပေး၊ အကြံပေးနိုင်ခဲ့လို့၊ ဂျပန်ရောနိုင်ငံခြားသားသူငယ်ချင်းတွေအားလုံးရဲ့ချစ်ခင်လေးစားမှုရရှိခဲ့တာကလည်း၊ ဂျပန်မှာပျော်ရတဲ့အကြောင်းတွေထဲက တစ်ခုပါပါတယ်။ ပညာလိုလားတဲ့စိတ်ကိုနားလည်တဲ့ဂျပန်ဆရာက တခြားဌာနတစ်ခုမှာ အရေးပါတဲ့သုတေသနတခုကိုမနှစ်ကတည်းက တွဲလုပ်စေခဲ့လို့၊ ကိုယ့်အတွက်ပညာတွေအများကြီးတိုးတဲ့အပြင်၊ ပြန်ရင်ကိုယ့်တက္ကသိုလ်မှာ ဘွဲ့လွန်တွေကိုဆက်လုပ်ခိုင်းလို့ရတဲ့ သုတေသနပရောဂျက်တွေ အကြံဥာဏ်ရလာခဲ့ပါတယ်။ မြန်မာပြည်မှာ အလုပ်တဖက်နဲ့ရသမျှအချိန်လေးမှာ ဂျပန်စာကြိုသင်ခဲ့တာကလည်း၊ နေ့စဉ်ဘ၀နဲ့ပေါင်းသင်းဆက်ဆံရေးအဆင်ပြေစေလို့ ဂျပန်စာမဖြစ်မနေသင်ခိုင်းခဲ့တဲ့ မြန်မာပြည်က ဆရာ့ကို ကျေးဇူးတင်နေရပါတယ်။

ကိုယ့်လိုဘဲ ပညာသင်ကာလကိုပျော်ပျော်ရွှင်ရွှင်ဖြတ်သန်းစေချင်တဲ့ဆန္ဒမွန်နဲ့ ဂျပန်လာပညာသင်ကြမယ့်ညီညီမငယ်တွေကိုအကြံပေးချင်တာက၊ မလာခင် ဂျပန်စာနဲ့ဂျပန်ရိုးရာထုံးတမ်းတွေကိုတတ်နိုင်သလောက်လေ့လာခဲ့ဖို့၊ ပညာရပ်ပိုင်းမှာ ပိုင်ပိုင်နိုင်နိုင်လေ့လာခဲ့ဖို့၊ အင်္ဂလိပ်စာဆိုလည်းသူတင်ကိုယ်တင်ဆွေးနွေးနိုင်တဲ့အနေအထားအထိ၊ အင်္ဂလိပ်စကားပြောကိုလည်းလေ့ကျင့်ခဲ့ဖို့၊ အကြံပေးချင်ပါတယ်။ ထဆွေးနွေးရမယ့်အခါမျိုးမှာ တွန့်ဆုတ်မနေ၊ နောက်ကမနေဘဲ ကိုယ့်အစွမ်းကိုထုတ်ပြပြီး၊ လူတွေသတိပြုမိလာအောင်လုပ်တတ်ရပါတယ်။ ဂျပန်စာတစ်ခုတည်းရရုံနဲ့နိုင်ငံခြားကျောင်းသားဟာ အဆင်မပြေပါဘူး။ တခြားနိုင်ငံခြားသားအတော်များများက အင်္ဂလိပ်လိုဘဲပြောဆိုဆက်ဆံချင်ကြတယ်။ အင်္ဂလိပ်လိုမရရင် နိုင်ငံခြားကျောင်းသားတွေကြားမှာ အဖော်မဲ့ပြီး အထီးကျန်ခံစားရပါမယ်။ ဒါ့အပြင် အင်္ဂလိပ်လိုသိပ်မရကြတဲ့ဂျပန်တွေက အင်္ဂလိပ်ကျွမ်းကျင်တဲ့သူဆို အထင်မသေးရဲပါဘူး။ သူတို့စာတမ်းကိစ္စတွေမှာကိုယ်က
ဝင်ထောက်ပေးနိုင်ရင် အကောင်းဆုံးသူငယ်ချင်းဖြစ်သွားပါတော့တယ်။ နှစ်ဘာသာလုံးကောင်းကောင်းရရင် ဂျပန်မှာအပေါင်းအသင်းဆန့်ပြီး၊ ပျင်းတာ၊ အထီးကျန်တာမရှိဘဲ စိတ်ဓာတ်ကျစရာအချိန်ကိုမရှိဖြစ်နေပါလိမ့်မယ်။ ဂျပန်လာခါနီးမှသင်တန်းတွေလိုက်တက်တာမဟုတ်ဘဲ ၆လ-၁နှစ်ကြိုပြီး အဖက်ဖက်ကပြင်ဆင်ခဲ့ကြဖို့ ဂျပန်မှာပညာလာသင်မယ့်ညီညီမငယ်တွေအတွက်အကြံပေးပါရစေ။

နောက်စိတ်ကျရောဂါရစေနိုင်တဲ့အကြောင်းတခုကတော့ ငွေရှာဖို့အချိန်ပိုင်းအလုပ်လုပ်ရတဲ့အခါမှာ၊ ကျောင်းအလုပ်ကတဖက်၊ အပြင်အလုပ်ကတဖက်နဲ့ စိတ်ဖိစီးမှုဖြစ်တတ်ပါတယ်။ မြန်မာပြည်ကဆရာကဒါတွေသိထားတဲ့အတွက်ကျွန်တော်တို့ကိုအမြဲဆုံးမတတ်တာက ရသမျှနဲ့ရောင့်ရဲပြီး ပညာကိုဘဲအားစိုက်သင်ဖို့ပါ။ ဒါကြောင့်ဆရာ့စကားကိုအမြဲနားထောင်လေ့ရှိတဲ့ကျွန်တော်ဟာ အချိန်ပိုင်းအလုပ်မလုပ်ခဲ့ပါဘူး။ ကံအားလျော်စွာ ဂျပန်အစိုးရရဲ့စကော်လာငွေအပြင်၊ ကျောင်းကသီးသန့် သုတေသနရံပုံငွေအစီအစဉ်မှာ ၀င်ဖြေပြီးအရွေးခံရလို့ လစဉ်လခငွေအပိုရနေခဲ့လို့၊ အလုပ်မလုပ်ပေမယ့် အနေချောင်ခဲ့ရပါတယ်။ ဒီလိုအရွေးခံရဖို့လည်း ကိုယ့်အထူးပြုဘာသာရပ်မှာ ပိုင်နိုင်နေဖို့နဲ့ TOEFL စတဲ့ဘာသာစကားကျွမ်းကျင်မှုအသိအမှတ်ပြုလက်မှတ်တွေရှိထားရင် အခွင့်အရေးများပါတယ်။ ဂျပန်အစိုးရစကော်လာမရှိတဲ့သူတွေလည်း ပုဂ္ဂလိကစကော်လာတွေလျှောက်မယ်ဆိုရင်၊ ဘွဲ့လွန်စာတမ်းရှိတာ၊ ဘာသာရပ်ဆိုင်ရာကျွမ်းကျင်မှုလက်မှတ်ရှိတာ၊ certificate-diploma စတာတွေရှိထားတာတွေက စကော်လာရဖို့ပိုအခွင့်အရေးရှိပါတယ်။ ဒါကြောင့်မြန်မာပြည်မှာ ရနိုင်သမျှလုပ်ခဲ့ကြဖို့အကြံပေးချင်ပါတယ်။
ှ
နောက်တခုကအစားအသောက်ပါ။ ကျွန်တော့်ဆရာက ဂျပန်ကိုတနှစ်ဘဲလာခဲ့ရပေမယ့် ဂျပန်အစားအသောက်တွေကို နှစ်သက်ပြီး ဂျပန်ကျောင်းလာတက်ရမယ့်သူတွေကိုအမြဲမှာလေ့ရှိတာက၊ မြန်မာစာဆိုတာ မွေးကတည်းက တသက်လုံးစားနေခဲ့ရ-ပြန်လာရင်လည်းဆက်စားရဦးမယ့်အစာဖြစ်တယ်။ ဂျပန်စာဆိုတာ ဂျပန်ရောက်မှစားရတာ-မြန်မာအစာတွေလို ဆီတရွှဲရွှဲပူပူစပ်စပ်တွေမဟုတ်ဘူး-ကျန်းမာရေးနဲ့ညီညွတ်တယ်-စားတတ်အောင်စားဆိုပြီးမှာပါတယ်။ ဆရာ့လိုဘဲ ကျွန်တော်လည်းဂျပန်အစားအစာတွေကိုကြိုက်မိပါတယ်။ နေ့လည်စာသူငယ်ချင်းတွေနဲ့အတူ ဂျပန်စာတွေတမျိုးပြီးတမျိုးလိုက်စားကြည့်ခဲ့ကြတာ ပျော်စရာလည်းကောင်း အမှတ်ရစရာလည်းကောင်းပါတယ်။ အထူးသဖြင့်ဆီမပါသလောက်နည်းနည်းနဲ့ချက်တတ်တဲ့သူတို့ချက်ပြုတ်ပုံကို သဘောကျမိပါတယ်။ အာဟာရဓာတ်ပြည့်တဲ့ပဲငံပြာရည်ကိုအဓိကသုံးတဲ့ဂျပန်စာတွေဟာ အရသာရှိပြီး ကျန်းမာရေးအတွက်အလွန်ကောင်းပါတယ်။ အနောက်နိုင်ငံကလူတွေတောင် ဂျပန်အစားအစာကျန်းမာရေးအတွက်ကောင်းမှန်းသိလို့ မက်မက်မောမောစားလာကြပါပြီ။ ထမင်းအဓိကစားတဲ့အရှေ့တိုင်းသားချင်းအတူတူဖြစ်တဲ့ကျွန်တော်တို့ဟာ ဒီလိုကောင်းတာတွေစားဖို့အခွင့်အရေးရှားရှားပါးပါးကြုံနေတာကိုမြန်မာအစားအစာမှ..ဆိုပြီးစိတ်စွဲနေရင် စားချင်တာမစားရ မစားချင်တာစားရဆိုတဲ့ စိတ်အလိုမကျဖိစီးမှုဖြစ်လာမှာပါဘဲ။

နောက်ဆုံးကတော့..ရောက်တဲ့အရပ်မှာပျော်အောင်နေ၊ တွေ့တဲ့သူနဲ့သင့်အောင်ပေါင်း....ဆိုတဲ့ မြန်မာအဆုံးအမအတိုင်းနေနိုင်ကြရင် ဘ၀ရဲ့နှစ်အနည်းငယ်ကို ဂျပန်မှာပျော်ပျော်ရွှင်ရွှင်ကြီးဖြတ်သန်းနေနိုင်မှာဖြစ်တဲ့အကြောင်းဆန္ဒမွန်နဲ့အကြံပြုလိုက်ရပါတယ်။